နင်အင်မတန် ပလီတယ်
သွားရင်းလာရင်း ဓားဓားချင်း လှံလှံချင်း
နင်နဲ့ငါ စကားချင်း အချိတ်အဆက်တွေ ပြုတ်ထွက်
စီးချင်းထိုးမလားဟေ့ဆိုရင်တော့ နင့်အကြည့်က ငါ့လည်ပင်းကို ပိုင်းဖို့ပဲ
ဒိုင်းတွေမရှိတော့ဘူး၊ အုန်းခွံရောင်မြင်းတွေ သမိန်ဗရမ်းတွေ ကားကုန်ပြီ
ပန်းဝင်လာတဲ့ ပြိုင်ကားတွေလည်းပဲ ပြိုင်းလို့ ပြုတ်ထွက်လို့ စရိုက်ကြမ်း
နင့်အလျော်အစားကလည်း လန်းသလား မမေးနဲ့
မျက်လုံးတစ်လုံးဆို တစ်လုံးချင်း
နံရိုးတစ်ချောင်းဆို တစ်ချောင်းချင်း
သူတောင်းစားက ပြတ်နေတဲ့လက်တစ်ဖက်ကိုပြပြီး
လူတကာဆီ အလျော်တောင်းတယ်
ဒုက္ခသည်ဦးထုပ်ဆောင်းပြီး ငါနင့်ဆီမှာ ရိုကျိူးလိုက်ပါရဲ့
ငါ့ရွေ့နေတာက ဘယ်ဝိုက်ညာဝိုက်
ငါပြောနေတာက သွယ်ဝိုက်တာတွေ ကွယ်ဖိုက်တာတွေ လုံးဝမပါ
စစ်ပွဲသတင်းထဲမှာ ဖီးယက်ကား ကြော်ငြာဝင်လာတော့မှ အသက်ရှုလိုက်ရတာ
အသက်ရှုကြမ်းလာတဲ့ ဆိုင်ကယ်တွေဟာ စစ်မြင်းတွေကို
တော်လှန်ခဲ့တယ်ဆိုတဲ့ ကြော်ငြာမျိုး နင့်သွေးတိုး ငါစမ်းမိ
ဖြစ်နိုင်ခြေများသလို၊ ချေလည်း ဖြစ်နိုင်တဲ့တီရှပ် နင်ဝတ်ပေါ့
ငါတို့လျာထားချက်တွေက မျက်စိမပွင့်ဘူး
နင့်အရေးပြားက ငါ့လက်ထဲမှာ ဒေါသကြီးပြနေတာ
ကြွေမိလ္လာခွက်ထဲမှာ တစ်မြို့လုံးရဲ့ စကားသံတွေ၊ ချောင်းဟန့်သံတွေ၊
ညစ်တီးညစ်ပတ် ရယ်သံတွေ
ဖုန်းတစ်လုံးက နင့်ခေါင်းအုံးနားမှာ
ကြွက်သေတစ်ကောင်ယောင်ဆောင်နေတယ်
ဒီနေ့ ငါတို့ကို အပိုင်းပိုင်းအတစ်တစ်ဖြစ်ဖို့ သူ့ အစိတ်အပိုင်းတွေကို
ကျစ်လစ်အောင် စုစည်းနေတယ်
ငါ့ဆီကို တေ့ထားတဲ့ နင့်နှုတ်ခမ်းတွေ ဖြုတ်လိုက်တာနဲ့ တစ်ခန်းလုံး
ရစရာမရှိမယ့်အဖြစ်
ဒီကောင့်စံနက်တံက အေးရာအေးကြောင်းပေါက်ကွဲဖို့ ချောင်းမြောင်းလို့
နင့်လက်သည်းတွေက နင်လက်လှမ်းမမှီတဲ့ နေရာ
ငါ့အရေပြားတွေက အခန်းအပူချိန်ထဲမှာ၊ နေရောင်
တိုက်ရိုက်မကျတဲ့ နေရာ
နင်နဲ့ ငါ တံခါးချက်ကို ဘယ်သူအရင်ပြေးဖွင့်မလဲ
မျက်လုံးချင်းချိန်လိုက်ရာက
တိုက်ပွဲစပြီ။

ဇော်လူစိမ်း

 တောင်မြင့်မို
အမြင့်ဆိုခေါင်ကတစ်။
အမေ့မေတ္တာနဲ့
နှိုင်းယှဉ်ကာ သူတုတော့
ဂမုငယ်ဖြစ်။
 အနောဒတ်ရေ
အေးမြစေ ခေါင်ကတစ် ။
အမေ့ရင်ရိပ်နဲ့
တဆိတ်ငယ် မယှဉ်စွမ်းတော့
ရေပူစမ်းဖြစ် ။
ကရဝိတ်သံ
ဂီတစံ ခေါင်ကတစ်။
အမေ့တေးနဲ့
ယှဉ်ရေးမှာသူမဝံ့တော့
နှုတ်ဆွံ့သူဖြစ် ။
ပန်းမဉ္ဇူ
လှိုင်ကြူရာ ခေါင်ကတစ် ။
အမေ့ကိုယ်ကျင့်နဲ့
ချင့်စက်ကာ ပြိုင်ဖြန့်တော့
အညံ့ပန်းဖြစ် ။
ဖိုးလမင်း
အလင်းတွင် ခေါင်ကတစ် ။
အမေ့အပြုံးနဲ့
ပခုံးချိန် သူထိုးတော့
ပိုးစုန်းကြူးဖြစ် ။
သမုဒ်ပြင်
နက်ရှိုင်းတွင် ခေါင်းကတစ် ။
အမေ့သစ္စာနဲ့
တုဖက်ကာချိန်စက်တော့
ရေပူစမ်းဖြစ် ။
မိုးကောင်းကင်
ပြန့်ပြောတွင် ခေါင်ကတစ် ။
အမေ့မျက်နှာနဲ့
တုဖက်ယှဥိ ပြိုင်လို့မှုန်းတော့
ကျောက်သင်ပုန်းဖြစ် ။
ကြီးမြတ်မှုအဝဝ
လှပမှု အထွေထွေ
မြတ်မွေးမေ ခြေစုံရင်း
ဝပ်ဆင်းရပေ ။
မြတ်ဗုဒ္ဓ သော်မှ
ဝါသုံးလ ပေးဆပ်ချေ
မကျေခဲ့မိ နို့ဖိုး။
ကဗျာဆို သားငမိုက်က
လင်္ကာတို ထွာတစ်ပိုဒ်နဲ့
ဦးခိုက်ကာ လက်စုံယှက်
နို့တစ်စက်ဖိုး ။ ။
ကံထွန်းသစ်

သခင်အောင်ဆန်းတရား

ငါ့ညီ ပြောင်ဝင်း၊ မောင်သစ်ဆင်း
မင်း၏ သားငယ်၊ မင့် သက်လှယ်ကို
အဘယ်တရား ဟောမည်နည်း။
ဆန်း၏ သတ္တိ
ဆန်း၏ သမာဓိ၊ ဆန်း၏ ပညာ
ဟောစရာကား၊ အလွန်များ၏
မင့်သားအရွယ်၊ သက်နှစ်ဆယ်တွင်
လူငယ် အောင်ဆန်း၊ သူ့ အစွမ်းကို
ပန်းကောင်းတပွင့်၊ ပန်ဆင်တင့်သို့
မင့်သား သိစေချင်လှ၏။
သူ့ အစွမ်းကား၊ အခြားမဟုတ်
အအုပ်ချုပ်ခံ၊ မျိုးခြားဒဏ်မှ
မြန်မာလွတ်လမ်း၊ ခရီးကြမ်းဝယ်
ဗန်းပြအလှ၊ ပကာသနကို
ပြာကျ လောင်မြိုက်၊ သူ မီးတိုက်၏
ခေတ်လိုက်ခါညီ၊ ခေတ်မီပညာ
ကြုံရာဘ၀၊ မျှတလုံလောက်၊ ခံမြို့ဆောက်၏
ထိုနောက် တဆင့်၊ မိုးထိလွင့်အောင်
ရိုးကျင့် မြင့်ကြံ၊ သူ့အလံတည့်
ပျံတလူလူ၊ သူထူခဲ့ကြောင်း
ခေါင်းဆောင်သဘော
မင့် သားချောကို
ပြောလိုက်ပါဘိ ဟောပါဘိ။      ။
ဇော်ဂျီ

စစ်ဆိုတာ
ကမ္ဘာမြေပေါ့ပါးအောင် စစ်ထုတ်လိုက်တဲ့ ရေစစ်လား
ငြိမ်းချမ်းရေးဆိုတာ
သေခြင်းမှာ လူတွေငြိမ်းချမ်း
ဒုက္ခတွေ သိမ်းသွားတာကို ဆိုလိုသလား။
သေနတ်သံတစ်ချက်မှာ သွေးတစ်စက်ဆင်းလာ
အစဉ်အဆက် ဒါဆို
နှင်းဆီတွေရဲနေတာ သွေးသောက်ထားလို့ပေါ့
ညနေ ညနေ နေလုံးကြီး နီရဲနေတာ
သေနတ်မှန်ထားလို့ပေါ့
သေချာပြီ ငါတို့နှလုံးသားများ နီရဲနေတာ
သေချာပြီ ငါတို့ သံသယဟာ မြဲခဲ့ပြီ
ကြည့်လေ … ရွှေဒင်္ဂါးပြားလေး
တစ်ဖက်မှာ ပန်းဥယျာဉ်
တစ်ဖက်မှာ ခေါင်းပြတ်
နောက်ထပ် ခုတ်ဖဲ့ထားတဲ့ လရဲ့မျက်နှာပြင်ပေါ်မှာ
သွေးလန့်နေတဲ့ အဘိုးအိုနဲ့ ယုန်တစ်ကောင်
ဟေ့ … လူတွေ
ကိုယ့်ဒဏ်ရာ ကိုယ်မေ့
ကော်ဖီဆိုင်ထိုင် ဂျာနယ်လေးတစ်စောင်ဖတ်လို့
စီးကရက်လေးဖွာ ဂြိုဟ်တုသတင်းတွေ စောင့်ကြည့်လို့
အိုးနဲ့ အိမ်နဲ့
ကမ္ဘာ့အနှံ့အပြား
ခင်ဗျားတို့ အိုးမဲ့ အိမ်မဲ့တွေကို အရသာခံနေလို့။   ။

ခရမ်းပြာထက်လူ

မြန်မာတို့အတွက် ကဗျာတစ်ပုဒ်

'ငါ' သာလျှင် တော် ၊ 'သူ' မတော် ဟု
လူတော် ထင်ပါ ၊ တို့မြန်မာကို
ဘယ်ခါ ဆယ်၍ ရမလဲ ၊၊

ကြွားရင်းနှင့် နစ် ၊ ဝါးရင်း နစ်သည့်
နစ်လျက်နေပါ ၊ တို့မြန်မာကို
ဘယ်ခါ ဆယ်၍ ရမလဲ ၊၊

အကောင်း, ဆိုးထင် ၊ ဆိုး, ကောင်းထင် နှင့်
အထင်လွဲပါ ၊ တို့မြန်မာကို
ဘယ်ခါဆယ်၍ ရမလဲ ၊၊

'သူ့'ကို ငါညှိုး ၊ 'ငါ့' သူညှိုးနှင့်
အညှိုးကြီးပါ ၊ တို့မြန်မာကို
ဘယ်ခါ ဆယ်၍ ရမလဲ ၊၊

ညည်း၍ မပြီး ၊ ညူ, မပြီးဘူး
အပြီးတကာ ၊ လုပ်နိုင်ပါမှ
တော်ရာရောက်လိမ့် နောင်အဖို့ ၊၊
နိုးကြ ထကြ မြန်မာတို့ ၊၊
သားမြေးတို့တွက် ကြိုးစားစို့ ၊၊
credit:http://www.maukkha.org/index.php/book-store/poem-maukkha/2638-2012-12-07-09-01-22

ခြင်္သေ့ရုပ်တုတွေ
မျက်စောင်းခဲနေတဲ့ ဆူးလေဘုရား
ခိုပြာခိုနက်ကလည်း လူလန့်စာစား။

ဗန္ဓုလကျောက်တိုင်လား
ဓားလွတ်တောင် မထောင်နိုင်။

အမှိုက်က စ
ပြာဿဒ်မီးလောင်ပဲ ကြားဖူးပါတယ်
အမှိုက်မသိမ်းလို့
ကာရာအိုကေယိမ်းက
အမှိုက်ပုံဘေးမှာ
တော်သလင်းအိမ်ရာဖြစ်သတဲ့။

လေလံသာပစ်
ဘာဖြစ်ဖြစ်၊ ဖြစ်တဲ့ခေတ်လို့
အရေးတော်ပုံ ၂၄ နှစ်သား
နိုင်ကျဉ်းကျောင်းသားတယောက်က ခနဲ့တယ်။

ရေးတတ်ရင် ၀တ္ထုဖြစ်သလို
ဝတ်တတ်ရင် ပေါ်ပင်ဖြစ်မှာပါ
ဆင်ဆာမဲ့ မီဒီယာခေတ်ဦး
အသစ်ဖူးတွေနဲ့ တဝေေ၀ ဆိုသူက ဆို။

ပြည်တော်ပြန်
အသံတချို့က
ညှီစော်နံသတဲ့၊ ဆိုမယ့်ပြောမယ့်သူတော့ ရှိသေး။

သင်းခွဲရတာ၊ ထင်းခွဲရတာလောက်
မခက်ပါဘူး ကိုယ့်လူရာ ဆိုပါလား
မီဒီယာမှာ ကြားမိတာ။

အဲလိုကောင်စားတွေကိုများ
နင့်မေကလွှား၊ မင်းတို့မို့
လက်ဖ၀ါးချင်းထပ်၊ ပါးချင်းကပ်ကြရတယ်လို့။ ။

မောင်လွမ်းဏီ
၁၅-၁-၂၀၁၃

နောက်ဆုံးအခေါက်ပါပဲ
ကျနော် ရွာကို ပြန်လာခဲ့ပါတယ် အမေ။

ရွာဆိုတာ
တမာ ထနောင်း
ရှားစောင်း ပြာသာဒ်
သန်း ဒဟတ်ပင်တွေနဲ့
မိုးနှံချုံပုတ်၊ ရှားပင်ငုတ်တို
နီညိုညို ကျောက်ခဲလုံးတွေနဲ့
ထန်းပင်မြင့်မြင့်ကြီးတွေကြားက
တဲကလေးတလုံးပါ။

အဲဒီတဲကလေးထဲ
အမေ လဲလျောင်းနေပေါ့။ 

အမေ ...
ကျနော် ရောက်လာပြီ အမေ
အမေ့ခြေအစုံကို ပွေ့ဖက်
အသံမထွက်ဘဲ ကျနော် ငိုတယ်။

ထန်းပင်မြင့်မြင့်ကြီးတွေပေါ်က
ရွက်ယောင်းခြောက်တွေ
တရှဲရှဲမြည်လို့
ကျနော့်ကို စကားမပြောချင်လို့
အမေ့သွားတွေ တင်းတင်းစေ့ထားသလား၊
ကျနော့်ကို မမြင်ချင်လို့
အမေ့မျက်လုံးတွေ မှိတ်ထားသလား၊
ထ ကြည့်ပါဦး
စကားပြောပါဦး အမေရယ်။

ဟော ... အမေ ...
အမေ့ကို သူတို့
ဟိုးမှာ မန်ကျည်းပင်တွေ စိမ်းစိမ်းညို့ညို့နဲ့
ဇရပ်အိုအို
ကျောက်တုံးနီညိုညိုတွေ စီထားတဲ့
သင်္ချိုင်းဆိုတဲ့နေရာကို
ပို့ကြတော့မလို့တဲ့။

လှည်းဘီးကို ပြင်ဆင်ပြီးကြပေါ့
အမေ့အလောင်းကို
ခေါင်းထဲထည့်ကြပေါ့
ကြေးစည်ကို
ရိုက်နှက်ကြပေါ့
ကျနော် မငိုပါဘူး အမေ
ငိုလို့ မရတော့ဘူး အမေ။ 

အမေ့မြေးကလေးလေးတွေ
ကျနော့်တူနဲ့ တူမလေးတွေ
သူတို့ ငိုပါစေ။

အမေ့သား သူတို့ရဲ့အဖေ
ကျနော့်အကိုကြီး
အမေ့သမီး သူတို့ရဲ့အမေ
ကျနော့်အစ်မ
သူတို့မောင်နှမ
အမေ့အရင် စောစောစီးစီး
ဟောသည်လောကကြီးထဲက
ထွက်ခွာသွားကြတော့
မိတဆိုး ဖတဆိုး
ဟောသည်ကလေးလေးတွေ
အမေ့အတွက် သူတို့ငိုပါစေ။

အမေ့အတွက်
သူတို့မျက်ရည်တွေဟာ
ထိုက်တန်ပါတယ် အမေ။

ကျနော်ကတော့
နွေဦးရက်တွေအကြောင်း
သီချင်းမဆိုနိုင်တဲ့
ဥသြငှက်တကောင်ရဲ့ ကြေကွဲမှုလို
ယာခင်းထဲက အမေ့ဘဝကို
အဝေးကပဲ
တမ်းတပူဆွေးခဲ့သူပါ အမေ။

“အမေ နေကောင်းပါစေ ...
အမေ့အား ထာဝရလုပ်ကျွေးပြုစုနိုင်သည့်ကိုယ်
ဖြစ်ရပါလို၏” 

ညအိပ်ရာဝင်၊ ရင်ထဲလှုပ်ခတ်
ပဲ့တင်ထပ်ခဲ့တဲ့
ခွန်အားမဲ့ ဆုတောင်းသံများကြား
ရှည်လျားလွန်းတဲ့ ညတွေသာ
ခန္ဓာကိုယ်ပေါ်
တိတ်ဆိတ်စွာ ကြေပြုန်းခဲ့ရ။

မနေ့ကတော့
“အမေဆုံးပြီ။ အမြန်လာ” တဲ့ 
ကုသိုလ်ကြမ္မာ၊ နုံချာလို့လား
ဆုတောင်းများ
မပြည့်ဝခဲ့ဘူး အမေ။

အမေက မွေးပေမယ့်
အမေကို လုပ်မကျွေးနိုင်ခဲ့တဲ့
ဟောသည် ခန္ဓာကိုယ်ကြီးဟာ
ဘာအသုံးကျတော့မှာလဲ။

အဲသည်လို နောင်တတရားတွေက
နှလုံးသားကို ကုတ်ခြစ်
ဘဝဆိုတာကိုလည်း
မကျေမနပ်ဖြစ်မိပေါ့။ 

ကျနော် မငိုရဲတော့ပါဘူး အမေ
ငိုဖို့ရာ ရှက်လှပါတယ် အမေ
အမေနဲ့အတူ
အမေကို ခြေဆုပ်လက်နယ်ပြုခဲ့တဲ့
ဟောသည် ကလေးလေးတွေ
သူတို့ ငိုပါစေ
ကြေးစည်ကို သူတို့ ရိုက်နှက်ကြပေါ့
လှည်းဘီးကို သူတို့ တွန်းကြပေါ့။

ဟော ...
နီညိုညိုကျောက်တုံးတွေကြားက
ရထားတစင်းဟာ
အဝေးကို ထွက်သွားပြီ။

ဟိုး ... လွန်ခဲ့တဲ့ အနှစ်နှစ်ဆယ်
သည်ရွာက လူငယ်
ကျေးတောသားတယောက်
သည်ရွာကို ပြန်ရောက်မလာ
ရထားဟာ သူ့ကို
အဝေးသို့ ခေါ်ဆောင်သွားခဲ့။

သူနဲ့ သူစီးသွားတဲ့ ရထားအကြောင်း
လူတွေ မေ့ကြပေါ့
ပြောဆိုအမှတ်ရသူ
တစုံတယောက်မျှ မရှိတော့။ 

အဲသည်လူငယ်ဟာ
အခု
အမေ့အလောင်း အမေ့ခေါင်းကို
ဖက်ဖက်ပြီး ငိုနေတဲ့
ကျနော်ပဲပါ့ အမေ။

ဟောသည်ယာခင်းတွေကြား
အမေ နေ့တိုင်းလှုပ်ရှားခဲ့တာ
ကျနော်မမြင်နိုင်ခဲ့ဘူး။ 

အမေ့သမီး
ကျနော့်အစ်မရဲ့ ယောက်ျားက
ထန်းရည်သမား၊ ထန်းရည်ချိုး၊
အမေ့သား
ကျနော့်အစ်ကိုကြီးရဲ့ မိန်းမက
မီးယပ်ကျိုး၊ မျက်စိတဘက်ကွယ်၊ 
သူတို့တတွေနဲ့ ကျန်ရစ်ခဲ့တဲ့
အမေ့မြေး ကလေးတွေနဲ့အတူ
ထန်းလျက်ကျို၊ ထင်းခွေရေခပ်
ငတ်မသေဖို့
အမေ ရုန်းကန်ခဲ့တဲ့နေ့တွေမှာ
ကျနော်သာ
ဟိုအဝေးမှာပေါ့။

ဟိုတနှစ်က
တရွာလုံး မီးလောင်ပြာကျ
အဲသည်ကတည်းက အမေဟာ
ရွာထဲကို ပြန်မရောက်
အိမ်ပြန်မဆောက်နိုင်
ထန်းပင်အောက်က ထန်းတဲမှာ
အမေ အနေကြာခဲ့ပါတယ်။

အမေရေ ...
အမေရေ ... ...
ကြေးစည်ကို ရိုက်နှက်ကြပေါ့
လှည်းဘီးကို သူတို့တွန်းကြပေါ့
ဟိုး ... အနောက်တောင်တောတန်းက
ထန်းပင်ရိပ်ဖျားမှာ
နေလုံးဟာ တဖြည်းဖြည်းညိုခဲ့ပေါ့။ 

တောင်သူဓလေ့
ယာမီးငွေ့တွေ လွင့်တက်လာပေါ့။

ဟိုတောင်ကမူကမ်းပါးမှာ
မြက်စားနေတဲ့ နွားမတွေက
အမေ့ကို နှုတ်ဆက်နေကြသလား။

သိန်းစွန်ငှက်အပြန်လမ်းမှာ
ကျီးကန်းတွေ ကသုတ်ကရက်နဲ့
ရွာဘက်ဆီ ပျံပြေးကြပေါ့။

နေညိုချိန် အိမ်အပြန်လမ်းမှာ
တောတန်းလျှိုမြောင်
ဟို အနောက်တောင်ထဲ
မှောင်မည်းမည်းက
ကျနော့်ဘဝကို မဝါးမြိုမီ
ကလေးဘဝအရွယ်
ငယ်ငယ်တုန်းကလေ
တောင်ရိပ်တောင်ကြား
သစ်ပင်ဖျားမှာ
မားမားရပ်နေ တစ္ဆေတွေလား။

အမေရေ ...
တစ္ဆေဆို ကျနော် ကြောက်လှချည့်။ 

တညသား
ပျူစောထီးဆိုလား၊ ရဲဘော်ဖြူဆိုလား
တံခါးကို တအားခေါက်
နွားကောက်စမ်း မြန်မြန်လုပ်
သေနတ်တွေ ထုတ်ချိန်ပြီး
အခိုင်အခံ့ လှည်းတစင်း
နွားပြာညိုတရှဉ်းနဲ့အတူ
လှည်းမောင်းပို့ဆိုပြီး အဖေ့ကို ခေါ်သွား
ရွာအနောက်ဘက်တောအုပ်ကြားက
သေနတ်သံတချက်ကြားလိုက်ရ။

အဖေရေ ...
အဖေရေ ... ...
ကျနော်တို့မိသားစုဘဝ
ရာဇဝင်ကို ဖြတ်သန်းရတဲ့ညပေါ့။

လွတ်လပ်ရေးပြီးခါစ
သူခိုးဓားပြတွေ
တန်ခိုးပြလို့ကောင်းဆဲခေတ်ကြီးထဲ
လူဖြစ်ခဲ့ရတဲ့ ကျနော်
အမေ့ရဲ့ကျောပေါ်မှာ
သေနတ်သံတွေကြား
ပြေးလွှားပုန်းအောင်း
ရွာတောင်စောင်း နဘူးချုံထဲ
ညတိုင်းပဲ အိပ်ခဲ့ရတယ်မဟုတ်လား အမေ။

စစ်စနက်မီး အကြွင်းအကျန်တွေနဲ့
ခေတ်အပျက်ကြီးကို တွန်းလှန်ရင်း
အမေရယ် တခြားအမေတွေရယ်
အမေတွေအားလုံး
ကလေးတွေကို ပုခုံးပေါ်တင်ပြီး
ပြေးကြလွှားကြ၊ ပုန်းကြအောင်းကြနဲ့
တချို့ သားသေ၊ တချို့လင်ဆုံး
စစ်ဆိုတာကြီးကို
မုန်းခဲ့တယ်မဟုတ်လား အမေ။

အဖေ မရှိတဲ့နောက်
အမေရယ်၊ အစ်ကိုကြီးရယ်၊ အစ်မရယ်၊ ကျနော်ရယ်လေ
လောက ကမ်းပါးမှာ
စမ်းတဝါဝါး လျှောက်ခဲ့ကြပေါ့
အရွယ်ရောက်ခါစ အစ်ကိုကြီး
ထန်းလှီးသင်ရပေါ့။

အစ်ကိုကြီးဟာ
သာသနာ့ဘောင်မှာ အရိုးထုတ်
ဘုန်းကြီးလုပ်ဖို့ စိတ်ကူးရှိပေမယ့်
ကျနော်တို့အတွက်
ယုံကြည်ချက်တွေ စွန့်ခဲ့ရပြီပေါ့။

ကျနော်ကတော့
သျှောင်တစောင်းနဲ့ ဘုန်းကြီးကျောင်းသား
ပြီးတော့ ပြည်တော်သာကျောင်းရောက်
ကျောင်းဆင်းချိန်မှာ
သိုး၊ ဆိတ်၊ နွားကျောင်း
ကျနော်တို့တတွေ
ဟိုသပြေပင်တောင်စောင်းဆီက
လက်ပြဟစ်အော်
သီချင်းတကြော်ကြော်နဲ့
ခွေးခေါ်၊ ပတတ်တူး
ဟင်းရွက်ခူး၊ ယုန်ရှာ
တောင်ယာလုပ်သူ၊ ထင်းခုတ်သူတွေ
ထန်းလျက်ကျိုသူ၊ ထန်းတက်သူတွေ
နေက ပူလောင်
ကုန်းခေါင်ခေါင်မှာ
ဟိုးအနောက်တောင်မှာ
မှိုင်းပြာပြာ မြူခိုးတွေနဲ့
ပုပ္ပားဆိုတဲ့ တောင်တော်မြတ်ကြီးဆီ
မျှော်ကြည့်ငေးမော
စိမ်းလန်းတဲ့ ယာတောတွေကြား
အစ်ကိုကြီးက ထန်းလှီး
ကျနော်က ထန်းရည်အိုးသယ်
အမေရယ်၊ အစ်မရယ်က
ထန်းလျက်ကျို၊ ရက်ကန်းခတ်၊ ထင်းခွေ
တခါတလေ မြေပဲကောက်
တခါတလေ ဝါစိုက်
တောအလိုက်လုပ်ငန်းစုံပေါ့။

“မြို့ရွာနိဂုံး၊ ပျက်ပြုန်းစေအောင်
ဓားပြကြီးကြီး မိုက်သီးအခေါင်
မီးနှင့်မြိုက်လို့၊ တိုက်ခိုက်ပူလောင်
ဝ သ လ၊ မှတ်ကြ သူယုတ်ကောင်”

“ခလောက်လေးရယ်တဲ့ ဒိုးဒိုးဒေါင်
ပျိုတို့မောင် ယာမလုပ်တယ်
ဝါးခုတ်တဲ့ တောင်” 

အဲသည်လို အကိုကြီး တတ်တဲ့
ကဗျာတွေ၊ သံပေါက်တွေ
ကျနော့်မှာ အမွေရခဲ့ပေါ့။

“နေညိုချိန်တိမ်တောက် ပျိုကြောက်တဲ့ သည်အချိန်
ဆီးမီးကွယ်မှန်အိမ်နဲ့ ... ” 

အဲသည်လို
ကျေးလက်ဘဝ သီချင်းကဗျာတွေ
ရင်ထဲမှာ အမြစ်တွယ်ခဲ့ရပေါ့။

အမေရေ ...
ကြေးစည်ကို ရိုက်နှက်နေကြပေါ့
လှည်းဘီးကို သူတို့တွန်းကြပေါ့။

အမေခေါင်းချခဲ့တဲ့ တဲကလေးဟာ
အမေ့ရွာနဲ့ အလှမ်းဝေးပေမယ့်
သည်တောသည်တောင်ကြား
အမေ့ကို
တယောက်တည်း မထားရက်ပါဘူး အမေ။ 

အမေ့အမေ ကျနော့်အဘွား
ကျနော့်အဘွားရဲ့ အမေ့အမေ ... စတဲ့
ဆွေမျိုးတော်စပ်သူရော မတော်သူပါ
တရွာလုံးနောက်ဆုံး စုဝေးရာ
ဟောဟို ဇရပ်အိုအိုရဲ့
သုဿာန်ဆိုတဲ့ နေရာရောက်အောင်
အမေ့ကို
ကျနော်တို့ ပို့မှာပေါ့။ 

လမ်းက ကြမ်းလိုက်တာအမေ
တောင်ကမူကျတ်တီးကြား
နှစ်တွေများစွာ ရေတိုက်စားမှုနဲ့
ပျက်လုလု လှည်းလမ်းပေါ်မှာ
အမေ့ခေါင်းဟာ၊ လှုပ်ယမ်းလှချည့်။ 

ဖြည်းဖြည်း ... ဖြည်းဖြည်း ...
ဆူးကိုင်းတွေ ဘေးဖယ်
မျက်နှာကို ခြစ်မိကြဦးမယ်။

ဟိုသုဿာန်ကို ရောက်တဲ့ခါ
ဘုန်းကြီးတွေက
သရဏဂုံကို ရွတ်ဖတ်
ကျနော့်လက်နဲ့ ရေစက်သွန်းချ အမျှဝေ
အမေ ကောင်းရာသုဂတိလားပါစေ ...လို့
ကျနော် အမျှဝေမယ်။

ကျနော့်ကိုယ်ပေါ်မှာ
ဖုန်တွေပေကပ်
ညစ်ပတ်နေမလားပဲ။ 

မန္တလေးက မိတ္ထီလာ
မလှိုင် ပန်းအိုင်တလမ်းလုံး
ဖုန်လုံးကြီးထဲ ဖြတ်ခဲ့ရ
အခုလည်းပဲ ဖုန်လုံးကြီးထဲမှာ
ဖုန်တွေ ပေကပ် ညစ်ပတ်နေမလားပဲ။

ဟိုသုဿာန်ကို ရောက်လို့
ရေစက်သွန်းချ အမျှဝေတဲ့အခါ
ငယ်ဆရာ ဘုန်းတော်ကြီး
ကျနော့်ကို ကြည့်ပြီး
အံ့သြနေလိမ့်မယ်။

ညရောက်တဲ့အခါ
ဦးလေးဘယ်နေ့ ပြန်မှာလဲ
တနှစ်တခါ ပြန်လာပါနော်
ကျနော် ကျောင်းဆက်နေချင်တယ်
ညီမလေးမှာ ဝတ်စရာအင်္ကျီ မရှိတော့ဘူး
ဟောဒီ အငယ်မ မနှစ်က နှစ်တန်းကျတယ် ငါ့မောင်ရယ်
ဟောဒီကျန်နေတဲ့ မျက်စိတဘက်ကလည်း ဆရာဝန်က ခွဲရမယ်တဲ့
အစ်မလည်း ကြောက်တတ်လို့ ဆေးရုံကို နောက်ထပ် မရောက်တော့ပါဘူး
စတဲ့ … စတဲ့ စကားလုံးတွေကြား
ကျနော် ဘာများ တာဝန်ယူနိုင်မလဲ။

မင်းတို့အတွက်၊ ငါ့အတွက်
အနှစ်သုံးဆယ်လုံးလုံး
ဦးလေး စဉ်းစားနေတုန်းပဲ
ဦးလေးဟာ
စဉ်းစားနေတုန်းပါပဲကွယ်။

တစုံတရာ
ကတိတွေ ပေးထားပစ်ခဲ့ပြီး
နံနက်ခင်းတခုမှာ
ငှက်တကောင်လို ပျံပြေးသွားမယ်။ 

ဟိုတခါက
အမေ့ကို ထားပစ်ခဲ့သလိုမျိုး

“ဟောသည်ကမ္ဘာမြေကြီးရဲ့
နာမကျန်းမှုတွေကို ဆေးဝါးကုသဖို့
ကျနော် ကဗျာဆရာလုပ်ရမယ်
ကဗျာဆရာလုပ်မှဖြစ်မယ် အမေ”

အဲသလို ဆိုပြီး
အမေ့ကို ထားပစ်ခဲ့တုန်းက
ယာခင်းနံဘေး
တောလမ်းလေးပေါ်မှာ
မြက်ရိုင်းပင်တွေကို တိုးဖြတ်
တရှပ်ရှပ်နဲ့ ကျနော့်ဖိနပ်သံတွေ
ကျန်ရစ်ခဲ့တယ်။

ယာခင်းတွေ နောက်မှာချန်
တောတန်းတွေ ကျန်ရစ်ခဲ့တယ်။

ကျောက်စရစ်ကုန်းခေါင်
တလင်းပြောင်မှာ
ယုန်ထောင်၊ ပတတ်တူး၊ ချိုးတည်
ငယ်ဘဝတွေ ကျန်ရစ်ခဲ့တယ်။ 

လိမ်လိမ်မာမာနေဖို့
စကားလုံးတို့ တုန်ခါ
အမေ့မျက်နှာပေါ်က
မျက်ရည်စတွေ ကျန်ရစ်ခဲ့တယ်။ 

သူငယ်ချင်းတွေ
လက်ပြနေဆဲ၊ ဥသြဆွဲပေါ့
တရှဲရှဲမြည်လျက် ရထားထွက်ခွာ
တုန်ခါနေတဲ့ ဓာတ်ကြိုးပေါ်မှာ
တောကျီးကန်းတကောင်
အော်မြည်ရင်း ကျန်ရစ်ခဲ့တယ်။

မြို့ပြဘဝရဲ့
ခံစားမှုမြစ် ရသသစ်ထဲမှာ
ပလက်ဖောင်းတလျှောက်
ဓာတ်တိုင် မီးတိုင်တွေအောက်
တယောက်ကို တယောက်
ဖြတ်ကျော်လျှောက်သွားရင်း
သူစိမ်းဆန်တဲ့ လူတွေကြားမှာ
ဟို ... အနောက်တောင်ဆီကို ရော်ရမ်း
တောလမ်းကလေးကို
လွမ်းခဲ့ရပေါ့ အမေ။

နေညိုချိန်အိမ်အပြန်
လမ်းဘေးတိုက်ကြား ဓာတ်တိုင်နားမှာ
မားမားရပ်နေ တစ္ဆေတွေလား
“အမေရေ ... တစ္ဆေကို ကျနော် ကြောက်လှချည့်”
ယောင်ရမ်း ရွတ်ဆိုမိသော်လည်း
ရဲရဲတင်းတင်း
ဖြတ်သန်းရပြီ အမေ။

လူမှုဗေဒ ဝေါဟာရနဲ့
ရသသစ်တွေက
နှလုံးသားကို တအားကုတ်ခြစ်
ပွတ်သပ်ပြီး ဖြေသော်လည်း
ယားယံမြဲပါအမေ။ 

ဆည်းဆာရီထဲ
တိုးရှဲဖြတ်သန်း
ကိုယ့်လမ်းကို သွားခဲ့ရ
စကားငြင်းဆန်
ကားဟွန်းသံတွေကြား
နှလုံးသားတိတ်ဆိတ် မသိစိတ်မှာ
ရောဂါထူပြောခဲ့ပေါ့ အမေ။

အမေ့ထံ ကျနော်ပြန်မလာနိုင်တော့ဘူး
ငါ့မြေးလေးတွေ
အမေ မြင်ချင်လှပြီဆို
ဟော ...
အကြီးလေးက မသုမာတဲ့
ပိန်ပိန်သွယ်သွယ် နဖူးကျယ်ကျယ်နဲ့
သိပ်ချစ်စရာကောင်းတယ် အမေ၊
အငယ်လေးက မငုဝါတဲ့
အစားပုတ်ပုတ်၊ ဝတုတ်တုတ်ကလေး၊
နောက်တယောက်က
သားကြီးမောင်ဖိုးကာ
ဆော့တဲ့နေရာမှာ မျောက်ရှုံးပါပဲ
ငယ်ငယ်လေးကတည်းက
မျောက်ကလေးလိုပဲ
ကြီးလာရင် မျောက်နဲ့တူမလားပဲ။

သူတို့မောင်နှမတတွေ
ဦးလေးတွေ၊ အဒေါ်တွေနဲ့ တွေ့ဖို့
ကျနော်လာချင်ပါရဲ့ ... ဒါပေမယ့် ... အမေ။ 

ဟော ...
ကျနော်တို့အားလုံးအတွက်
အရွယ်မရောက်ခင်
ထန်းလှီးသင်ခဲ့ရတဲ့ အကိုကြီး
ထန်းပင်ပေါ်က ဇောက်ထိုးကျ
အနိစ္စရောက်ခဲ့ရပြီမဟုတ်လား။ 

ကျနော့်အစ်မ
အမေ့သမီး ပိန်တာရိုးလေး
သားသမီးခုနှစ်ယောက်မွေးတော့
ဆင်းရဲမှုဒဏ် မခံနိုင်လို့ထင်ရဲ့
အနိစ္စရောက်ခဲ့ရပြီမဟုတ်လား အမေ။ 

အမေ ... သည်တောသည်တောင်ထဲမှာ
အမေ့သားသမီးတွေနဲ့
အနေဝေး၊ အသေဝေးခဲ့ကြရသော်လည်း
အမေတယောက်တည်းမဟုတ်လား။ 

အမေ့မြေးတအုပ်နဲ့
ထန်းလျက်ကျို၊ ထင်းခွေ၊ ရေခပ်
ကျနော် တပြားတချပ်မှ
မထောက်ပံ့နိုင်ပေမယ့်၊ ငတ်မသေခဲ့ဘူး
အမေ သေရတာ
ငတ်လို့ မဟုတ်ဘူး အမေ။

မနေ့က အမေဆုံးကြောင်း ကြေးနန်းရတော့
ခရီးသွားဖို့ ဇနီးမယားနဲ့ တိုင်ပင်
ပြင်ရဆင်ရ ငွေရှာရနဲ့ပေါ့။ 

ညရောက်တော့လည်း ရင်ထဲမအေး
ပူဆွေးနေဆဲမှာ
ကလေးတွေက တီဗီသွားကြည့်ကြသတဲ့
သြော် ... မင်းတို့ အဖွားသေတဲ့ ရက်
မင်းတို့အတွက်
ဘာမှ မခံစားရပါလားနော်။ 
ငယ်သေးတဲ့ ကလေးလေးတွေပဲဆိုတာက တကဏ္ဍပေါ့။

မြို့ပြမှာနေတဲ့ အမေ့မြေးကလေးတွေ
အမေနဲ့ တအားဝေးခဲ့ပါလားဆိုတဲ့ အတွေးတွေက တကယ့်ကိုပါပဲ
ဘဝဆိုတာကိုလည်း
မကျေမနပ်ဖြစ်ရပြန်ပေါ့ အမေ
ခံစားရပြီပေါ့
ကျနော် ခံစားရပြီပေါ့ အမေ။ 

ကျနော်ဟာ
အဲဘတ်ကမူးမှ မဟုတ်ဘဲ
ကျနော်ဟာ
မာဆိုးမှ မဟုတ်ဘဲ
အခက်အခဲတွေ ရှိပေမယ့်
ကျနော်ဟာ
ဗုဒ္ဓဘာသာ ဗမာယဉ်ကျေးမှုထဲက
လူတယောက်အဖြစ်နဲ့ပဲ
အသက်ရှင်နေဆဲပါ အမေ။ 

အမေရေ ...
အမေရေ ... ...
အမေရေ ... ... ...
ကြေးစည်ကို ရိုက်နှက်ကြပေါ့
လှည်းဘီးကို သူတို့ တွန်းကြပေါ့
အမေ့ခေါင်းဟာ
လှည်းပေါ်မှာ ယိမ်းထိုးလို့
ရှားစောင်းပြာသာဒ်ပင်ပေါ်က
ဒေါ့ရင်းဆိုတဲ့အကောင်တွေ
တကျည်ကျည်မြည်လို့။

အမေ့မြေးကလေးလေးတွေ
အမေ့ရဲ့ ဆွေမျိုးသားချင်းကလေးတွေ
အမေ့ကို ခင်မင်တဲ့သူတွေ
မရဏတေးကို ရွတ်ဆိုငိုကြွေးလို့ 
အမေ့ခေါင်းပေါ်
ညောင်ရွက်တွေကြွေကျ
ဒါဟာ သင်္ခါရတရားပေဘဲလို့
ဆိုချင်သလား မသိပေဘူး အမေ။ 

ကုန်တန်ချိန်အပြည့်နဲ့ ကားတစီး
အဝေးပြေးလမ်းမကြီးပေါ်
ဖြတ်မောင်းသွားနေရဲ့။ 

ထန်းပင်မြင့်မြင့်ကြီးတွေပေါ်က
ရွက်ယောင်းခြောက်တွေ
တရှဲရှဲမြည်လို့ ...။ ။